Instituti për Zhvillim Strategjik (IZHS) është krenar të jetë një nga partnerët zbatues të projektit “Peacebuilding on Board”, një nismë rajonale që synon të forcojë rolin e të rinjve në ndërtimin e paqes në Ballkanin Perëndimor. Projekti udhëhiqet nga organizata NVO PRIMA nga Mali i Zi dhe zbatohet në bashkëpunim me SMOC nga Bosnjë dhe Hercegovinë dhe LINK nga Serbia, me mbështetjen e Zyrës Rajonale për Bashkëpunimin Rinor (RYCO), në kuadër të thirrjes së hapur për projektet e shoqërisë civile “RYCOnnecting You(th)”.

• Qëllimi i projektit

“Peacebuilding on Board” synon fuqizimin e të rinjve si aktorë të rëndësishëm të paqes dhe ndryshimit social në komunitetet e tyre. Nëpërmjet aktiviteteve ndërvepruese dhe metodave kreative të të nxënit, të rinjtë pjesëmarrës do të angazhohen në:

• Trajnime mbi ndërtimin e paqes dhe zgjidhjen paqësore të konflikteve;
• Zhvillimin e një loje edukative, e cila do të përdoret në punëtori dhe gara rinore për të nxitur dialogun, mirëkuptimin ndërkulturor dhe bashkëpunimin ndërmjet të rinjve nga rajoni.

• Përse ky projekt është i rëndësishëm

Ballkani Perëndimor mbetet një rajon me sfida historike, por me një potencial të jashtëzakonshëm për bashkëpunim rajonal dhe zhvillim paqësor. Fuqizimi i të rinjve me njohuri, mjete dhe hapësirë për të vepruar është çelësi për ndërtimin e një të ardhmeje më të sigurt, të qëndrueshme dhe të bashkuar. Përmes “Peacebuilding on Board”, IZHS angazhohet të promovojë vlera pozitive si respekti, bashkëjetesa dhe solidariteti mes të rinjve, duke kontribuar në një vizion të përbashkët për paqe në Ballkanin Perëndimor. Na ndiqni për më shumë informacione mbi aktivitetet e projektit, punëtoritë dhe materialet edukative që do të prezantohen së shpejti! Projekti mbështetet nga Thirrja e Hapur për projektet e shoqërisë civile nga RYCO: “RYCOnnecting You(th)”.